ਸੁਨਾਮ (ਰਮੇਸ਼ ਗਰਗ) : ਅਕੇਡੀਆ ਵਰਲਡ ਸਕੂਲ, ਸੁਨਾਮ ਵੱਲੋਂ ਸਾਲਾਨਾ ਸਮਾਰੋਹ “Impulse-2025” ਬੜੀ ਧੂਮਧਾਮ ਅਤੇ ਉਤਸ਼ਾਹ ਨਾਲ ਮਨਾਇਆ ਗਿਆ। ਸਮਾਗਮ ਦੇ ਮੁੱਖ ਮਹਿਮਾਨ ਸ਼੍ਰੀਮਤੀ ਪ੍ਰਭਜੋਤ ਕੌਰ, ਡਾਇਰੈਕਟਰ-ਕਮ-ਪ੍ਰਿੰਸੀਪਲ, ਜੀ.ਜੀ.ਐੱਸ ਪਬਲਿਕ ਸਕੂਲ, ਸੰਗਰੂਰ ਤੇ CBSE City Cordinator ਨੇ ਦੀਪ ਜਲਾ ਕੇ ਪ੍ਰੋਗਰਾਮ ਦੀ ਸ਼ੁਰੂਆਤ ਕੀਤੀ।
ਇਸ ਮੌਕੇ ‘ਤੇ ਵਿਸ਼ੇਸ਼ ਮਹਿਮਾਨ ਵਜੋਂ ਸ਼੍ਰੀ ਡੀ.ਪੀ.ਐਸ. ਗਰੇਵਾਲ (ਰਿਟਾ. ਡਾਇਰੈਕਟਰ PSPCL), ਡਾ.ਅਤੁਲ ਗੁਪਤਾ, ਡਾ. ਰਾਜੀਵ ਜਿੰਦਲ, ਡਾ. ਪ੍ਰਾਗਿਆ ਗੁਪਤਾ ਅਤੇ ਡਾ.ਸਿਮਪੀ ਜਿੰਦਲ ਵੀ ਹਾਜ਼ਰ ਸਨ।
ਬੱਚਿਆਂ ਨੇ ਆਪਣੇ ਰੰਗਾਰੰਗ ਪ੍ਰੋਗਰਾਮ ਨਾਲ ਦਰਸ਼ਕਾਂ ਦੇ ਦਿਲ ਜਿੱਤ ਲਏ। ਸ਼ਬਦ ਨਾਲ ਸ਼ੁਰੂ ਹੋਏ ਪ੍ਰੋਗਰਾਮ ਵਿੱਚ ਸਾਲਸਾ, ਹਿੰਦੀ ਪਲੇ–ਸ਼ਿਵਾਜੀ, ਮਲਵਾਈ ਗਿੱਧਾ, ਦੱਖਣ ਭਾਰਤ ਅਤੇ ਤੇਲਗੂ ਡਾਂਸ, ਨਰਸਰੀ–ਹਨੀ ਬਨੀ ਡਾਂਸ , ਇੰਗਲਿਸ਼ ਪਲੇ–ਸਪੀਕ ਆਊਟ, ਵੈਸਟਰਨ ਡਾਂਸ, ਟੋਕਾ ਟੋਕਾ ਡਾਂਸ, ਲਾਵਣੀ, ਪਾਣੀ ਬਚਾਓ ਥੀਮ ਡਾਂਸ, ਗੁਜਰਾਤੀ ਨਾਚ, ਆਰਕੈਸਟਰਾ, ਲੁੱਡੀ, ਮਾਈਕਲ ਜੈਕਸਨ ਸਟਾਈਲ ਡਾਂਸ, ਪੰਜਾਬੀ ਪਲੇ-ਜਫ਼ਰਨਾਮਾ , ਹਰਿਆਣਵੀ ਅਤੇ ਭੰਗੜਾ ਵਰਗੀਆਂ ਸ਼ਾਨਦਾਰ ਪੇਸ਼ਕਾਰੀਆਂ ਨੇ ਸਮਾਰੋਹ ਨੂੰ ਚਾਰ ਚੰਦ ਲਾ ਦਿੱਤੇ। ਸਮਾਗਮ ਦਾ ਸੰਚਾਲਨ ਅੱਠਵੀਂ ਜਮਾਤ ਦੀ ਵਿਦਿਆਰਥਣ ਸਮਰੀਨ ਕੌਰ ਅਤੇ ਦਸਵੀਂ ਜਮਾਤ ਦੇ ਵਿਦਿਆਰਥੀ ਦੇਵਾਂਸ਼ ਦੁਆਰਾ ਮਿਸ ਸੁੰਬੂਲ ਫਾਤਿਮਾ ਦੀ ਦੇਖ- ਰੇਖ ਹੇਠ ਕੀਤਾ ਗਿਆ।
ਮੁੱਖ ਮਹਿਮਾਨ ਸ਼੍ਰੀਮਤੀ ਪ੍ਰਭਜੋਤ ਕੌਰ ਨੇ ਬੱਚਿਆਂ ਦੇ ਵਿਸ਼ਵਾਸ, ਮਿਹਨਤ ਅਤੇ ਕਲਾ ਦੀ ਪ੍ਰਸ਼ੰਸਾ ਕੀਤੀ ਤੇ ਸਕੂਲ ਪ੍ਰਬੰਧਕਾਂ ਦੀ ਤਾਰੀਫ਼ ਕੀਤੀ ਕਿ ਉਹ ਵਿਦਿਆਰਥੀਆਂ ਨੂੰ ਸਮੁੱਚੇ ਵਿਕਾਸ ਦੇ ਮੌਕੇ ਪ੍ਰਦਾਨ ਕਰ ਰਹੇ ਹਨ।
ਸਕੂਲ ਦੇ ਚੇਅਰਮੈਨ ਐਡਵੋਕੇਟ ਗਗਨਦੀਪ ਸਿੰਘ, ਪ੍ਰਿੰਸੀਪਲ ਰਣਜੀਤ ਕੌਰ ਨੇ ਸਾਰੇ ਮਹਿਮਾਨਾਂ ਅਤੇ ਮਾਪਿਆਂ ਦਾ ਧੰਨਵਾਦ ਕੀਤਾ। ਪ੍ਰਿੰਸੀਪਲ ਸਾਹਿਬ ਨੇ ਵਿਦਿਆਰਥੀਆਂ ਦੇ ਸ਼ਾਨਦਾਰ ਪ੍ਰਦਰਸ਼ਨ ਦੀ ਸ਼ਲਾਘਾ ਕੀਤੀ। ਅਧਿਆਪਕਾਂ ਦੇ ਸਮਰਪਣ ਦੀ ਵੀ ਪ੍ਰਸ਼ੰਸਾ ਕੀਤੀ। ਸਮਾਗਮ ਦਾ ਅੰਤ ਰਾਸ਼ਟਰੀ ਗਾਨ ਨਾਲ ਕੀਤਾ ਗਿਆ।